ХЭВЛЭЛИЙН БАГА ХУРАЛ БОЛЛОО

     Түүхий нүүрс түлж буй талаарх мэдээлэл, иргэдийн санал, гомдлыг 102 тусгай дугаарт авдаг боллоо.

НОК, НАБТГ, Нийслэлийн Цагдаагийн газрын хамтын ажиллагааны хүрээнд Нийслэлийн агаарын чанарын өнгөрсөн долоо хоногийн мэдээллийг холбогдох албаныхан танилцууллаа.

     Нийслэлийн Агаарын бохирдолтой тэмцэх газрын дарга Б.ПҮРЭВСҮРЭН: Өнгөрсөн долоо хоногт хэд хэдэн томоохон ажил зохион байгуулсны нэг нь 102 тусгай дугаарт түүхий нүүрсний хэрэглээний талаарх гомдол, мэдээллийг хүлээн авдаг болж байна. Зөвхөн түүхий нүүрс төдийгүй дугуй, хаймар, тос масло зэрэг зориулалтын бус агаар бохирдуулагч зүйлсийг шатаасан тохиолдолд ч 102 дугаарын утсанд мэдээлэхийг иргэдээсээ уриалж байна гэлээ.

     Түүнчлэн иргэдийг стандартын зуух хэрэглэж заншихыг уриалав. Түүхий нүүрс, стандартын бус зуух хэрэглэснээр зөвхөн та, танай гэр бүлийнхэн хохироод зогсохгүй хөрш айлынхан ч мөн хордож байдаг тул хөрш айлууд, зэргэлдээ суурьшиж буй хүмүүсийн мэдээлэл чухал байгааг тодотгосон юм. Өнгөрсөн хугацаанд сайжруулсан шахмал түлшний хоногийн борлуулалт 3000-3200 тоннд хүрчээ.

Мэргэжлийн хяналтын байгууллагынхан цагдаагийн ажилтнуудтай хамтран тээврийн товчоод дээр 24 цагаар ажиллаж байгаа бөгөөд өнгөрсөн долоо хоногт 82 шуудай шахмал түлшийг хөдөө, орон нутаг руу тээвэрлэхийг завдсан байна. Тээвэрлэгч иргэнд торгууль ногдуулж, шахмал түлшийг Амгалан станцад буулгажээ. Өнгөрсөн долоо хоногийн байдлаар нийслэлийн төвийн зургаан дүүргийн хэмжээнд 15 тонн түүхий нүүрс оруулж ирснийг илрүүлж хураасан байна.